(Бўлган воқеа)
Қиз мактабнинг 8 - синфида ўқир эди. Оилада тартибдан тартибсизлик ҳукмрон эди. Она кўп касал бўлар, болалар кўпинча ўз ҳолига қолиб кетар эди. Она қаттиқ касалланиб, шифохонага ётқизилди.
Шифохонадан чиқгач, ҳали оёққа турмасидан уни мактабга чақиришди. Директор хонасига!
Воқеа аслида қизлар ўқийдиган коллежларда ҳомиладор қизлар кўпайгани ва шунинг орқасидан мактаблардаги қизларни ҳам текшириш орқасидан бошланган эди. Она директор хонасида гап нимада эканлигини тушуниб етмасидан, хонага қизни олиб киришди. Синф раҳбари онага босиқлик билан вазиятни тушунтирди. Она пешонаси терга ботиб, чуқур - чуқур нафас олишни бошлади. Директор: " Биз бундай аҳлоқсизликни кўтаролмаймиз! Фалон мактабдаги қизлар ҳомиладор эмиш деган гап бизга иснод! Қизингиз: " Уйимдагилар билмасин ", деб ёлворди. Лекин бу қабиҳликка биз шерик бўла олмаймиз! Буни олдини олишимиз керак. Қизингиз бошқаларга ҳам ўрнак бўлмасидан, бунинг чорасини кўришимиз керак. Айтсин кимлигини! Унинг ҳам уйидагиларни чақирайлик! Вақтида чора топайлик! ", деб онанинг юзига қаради. Она ўзини бошқара олмай, қизининг юзига қайта - қайта шапалоқ тушириб: " Айт! Ким у? Айт, гапир! Ким? Ҳайвон! Шарманда! Ер билан битта қилдинг - ку! Нима ахлатларни еб юрибсан? Уятсиз, кўрнамак! Одамларга нима дейман? Айт, кимлигини! ", деб бақирар эди. Қиз эса тинмай йиғлар, сочлари тўзиб, рангида ранг қолмаган эди. Онанинг қистови яна авжига чиқди. Қизини ура кетди. Ўртага синф раҳбари, директор тушиб ажратиб олишди. Директор қизга: " Қизим кимлигини айтишинг керак! Вазиятни чигаллаштирма! Биз йўлини қиламиз! Онангни қийнама! Бўлақол ким у? "
Жавоб ҳаммани карахт аҳволга солиб қўйди. Она бечора ҳомиланинг отаси кимлигини билгач, ерга ағдарилиб тушди. Тез ёрдам уни олиб кетди. Қизининг қисмати уни фалаж қилган эди.
Нега? Чунки қиз: " Ким у ", деган саволга " Дадам ", деб жавоб берган эди. Онаси кўп касал бўлгани учун ота доим қизидан фойдаланиб келганини айтиб берган эди.